Fyrst må eg få framheva at eg har stor sympati med heimesitjarane!

Det er stadig fleire som seier at uansett kva ein røyster, ser ein minimale endringar. Eg trur at dei som påstår dette har mykje rett. Diverre er ikkje media så flinke til å opplyse folk om at det finst alternativ til det etablerte systemet, og når dei trekk fram alternative retningar er det mest fokus på kva som skjedde for over 30 år sidan. Dei vala me har i dag, slik eg ser det, står mellom å røysta på eit av partia som alt sit på stortinget, sitja heime, eller å røysta på eit parti som ynskjer endring.

I Noreg har me politikere frå det ytterste høgre til SV på venstresida som alle påstår at dei står for noko unikt, radikalt og mykje betre enn andre. Men er dette sant? – Absolutt ikkje, er min påstand. Om partiet heiter FrP eller SV vil framleis kapitalismen ligge i botten og bestemma den praktiske politikken til partia med ein gong dei kjem i possisjon. Systemet me har legg store føringar for kva som er mogeleg å gjennomføra.

Raudt meiner at det er kapitalismen, og ikkje menneskets natur, som er hindringa for å skape eit rettferdig og solidarisk samfunn. Raudt er imot marknadsliberalistanes tru på fri konkurranse som grunnlag for samfunnsutviklinga. Me kan ikkje forsvara eit system som har som mål å skape vinnarar og taparar av folk.

Raudt har sagt at dei vil støtta ein ny Raud/Grøn regjering, ikkje fordi me tykkjer denne er så bra, men fordi alternativet er endå verre. Torstein Dahle, Raudt sin fyrstekandidat i Hordaland, vil vera ein markert røyst for Hordaland og distrikta. Og ikkje minst vil han gjera alt han kan for å pressa regjeringa til å føra ein meir rettvis politikk. Å røysta Torstein Dahle inn på stortinget vil vera ein røyst for forandring!